Af fordómafullri þjóð erum við komin

Gríðarleg gleði hríslaðist um skrokk Naglans þegar úrslit kosninga í Vestri voru kunngjörð. Loksins getur einhver staðið upp í hárinu á einfalda kúrekanum, og vonandi komið í veg fyrir að hann framkalli fleiri hörmungar yfir heimsbyggðina. Nóg er nú samt í Írak, og ástandið þar er hálfu verra nú en þegar geðsjúklingurinn Saddam var við völd.
Svei mér þá, ég veit ekki hvor er verri, Bússi glaseygði eða Saddam siðblindi.

Hvernig á svo að útskýra skyndilega aukningu við fylgi Frjálslyndra? Er íslenska þjóðin virkilega svona þjóðernissinnuð, að um leið og einn flokkur boðar stefnu sem felst í "Ísland fyrir Íslendinga" að þá rýkur lýðurinn upp til handa og fóta, og styður þann flokk.
Manni stendur nú ekki á sama um landa sína ef svo er í pottinn búið og hreinlega skammast sín fyrir þeirra hönd.
Ég, persónulega, fagna þeim fjölbreytileika sem kominn er í íslenskt mannlíf, því fátt er skemmtilegra en að kynna sér framandi menningu með öllu sem henni tilheyrir, hvort sem um ræðir trúarbrögð, matargerð eða menningarsögu. Maður spyr sig, hvort það hafi ekki verið kominn tími til að krydda einsleita mannflóruna hér norður í Ballarhafi?
Frá því að Hrafna-Flóki og félagar spígsporuðu um mela og grundir, höfum við Íslendingar verið eins.
Meginþorri þjóðarinnar skartar sauðlituðu hári og myglugráu hörundi af 9 mánaða sólarleysi og D-vítamín skorti. Orðið "skollitað" var eflaust fundið upp til að láta þeim sem voru einlitir frá toppi til táar líða betur.

Svo dirfast menn að tala um að vandamál fylgi "þessu fólki" og við eigum að læra af öðrum þjóðum sem hafa upplifað hryðjuverk af hendi innflytenda.
Halda menn virkilega að Sayed Ali sem vinnur við að þrífa Landspítalann, sprengi sjálfan sig í loft upp í Leið 5 upp í Mjódd?
Eða að hann ræni TF-FRÚ og fljúgi henni á Hallgrímskirkju?
Við skulum nú bara koma okkur niður á jörðina og átta okkur á að þessi ögn í Atlantshafi er nú ekki merkilegri en það að neinn nenni að standa í einhverju veseni.
Hann myndi allavega ekki öðlast neina frægð í sínu heimalandi því það hefur varla nokkur maður sunnan Alpa heyrt okkar getið.
Við erum ekki einu sinni með í aðalkeppni Eurovision!!!

Ég hef ekki trú á öðru en að þeir sem flytjast til Íslands, séu að því í leit að betra lífi en í boði er í þeirra heimalandi.
Við skulum líka bara þakka fyrir að einhverjir vilji koma og búa hérna í norðannepjunni þar sem veðsetja þarf eignir sínar fyrir kjúklingabringum, og óþolandi flottræfilshátturinn tröllríður öllu.

Mér finnst þessi innflytjenda umræða vera á svo lágu plani, að það er ótrúlegt að dagblöð skuli í raun fórna pappír í hana.