Jolagjafarugl

Mikið ofboðslega leiðist mér þetta jólagjafavesen hvert einasta ár.
Mér finnst þetta alveg fáránleg hefð, og hananú! Kallið mig bara Scrooge ef þið viljið! Mér finnst aðrar hefðir kringum jólin alveg yndislegar, til dæmis sendi ég alltaf jólakort og finnst það nauðsynleg hefð.
Eins finnst mér dásamlegt að hitta fjölskylduna og ég tala nú ekki um að borða saman góðan mat.
En að maður sé að gefa fullorðnu fólki einhverjar 'useless' gjafir sem yfirleitt enda bara lengst inni í skáp ónotaðar ár eftir ár, er náttúrulega bara út í hött. Mér finnst að það eigi ekki að gefa öðrum gjafir eftir fermingu viðkomandi!
Svo vandast nú aldeilis málið þegar ég er spurð hvað ég vilji í jólagjöf. Mig vantar ekki neitt og ef mig vantar eitthvað þá hreinlega kaupi ég það bara. Til hvers á annað fólk að vera að eyða sínum peningum, dýrmætum tíma og þolinmæði í að leita að einhverju sem ég kannski, hugsanlega gæti notað ??

Mér leiðist þetta neyslusamfélag sem við vestrænar þjóðir höfum búið til þar sem lífið snýst ekki um annað en að kaupa, kaupa, kaupa mat, gjafir og alls konar óþarfa. Hvað haldið þið að mikið af mat sé hent um jólin. Hvert einasta heimili kaupir ábyggilega u.þ.b 30% meira en borðað er og restin endar í ruslinu á meðan börn svelta heilu hungri í vanþróaðri ríkjum.

Væri ekki nær að eyða jólagjafapeningum í að styrkja hjálparstarf víðsvegar um veröldina?
Það finnst mér meira í samræmi við boðskap jólanna heldur en að sogast í kaupæðið í Kringlunni jól eftir jól.